Сайёр солиқ текширувлари ва солиқ аудити натижалари устидан тўғридан-тўғри судга шикоят қилиш мумкин

Солиқ кодексига бу ҳақдаги ўзгартиришлар 20.02.2024 йилдаги ЎРҚ-910-сон Қонун билан киритилди. Қонун 2024 йил 21 февралдан кучга киради.

Илгари амал қилган тартибга мувофиқ солиқ органларининг сайёр солиқ текширувлари ёки солиқ аудити натижалари бўйича қабул қилинган қарорлари устидан шикоят фақат юқори турувчи солиқ органига берилиши мумкин бўлган. У қарори устидан шикоят берилаётган солиқ органи орқали берилган ва ушбу орган 3 кун мобайнида шикоятни барча материаллар билан юқори турувчи органга юбориши шарт бўлган. Ва фақат шу ҳолатда, агар сиз шикоятингизни кўриб чиқиш натижаларидан норози бўлсангиз, судга мурожаат қилишингиз мумкин бўлган.

Солиқ кодексида солиқ органларининг сайёр солиқ текширувлари ва солиқ аудити натижалари бўйича қабул қилинган қарорлари устидан тадбиркорларнинг тўғридан-тўғри судга шикоят қилишига доир чекловлар бекор қилинди. Тадбиркорлар солиқ органларининг сайёр солиқ текширувлари ва солиқ аудити натижалари бўйича қабул қилинган қарорлари устидан тўғридан-тўғри судга шикоят қилишлари мумкин.

Тадбиркорлар амалда бундай ҳуқуққа 2023 йил 1 мартдан бошлаб эга бўлишган. Шунингдек, илгари ушбу норма Солиқ текширувларини ташкил этиш ва ўтказиш тартиби тўғрисида низомга киритилганди .