Узоқ муддатли хизматлар кўрсатувчи чет эл компанияси қачон ДМни рўйхатдан ўтказиши керак

«Ташкилот ускунани харид қилиш ва ускунани ишга тушириш-созлаш ва ўрнатиш бўйича хизматларга доир импорт контрактини тузмоқчи. Контракт 2023 йилнинг декабрь ойида тузилади, ускунани етказиб бериш эса фақатгина 2026 йилда амалга оширилади. Ускуна етказиб берилганидан сўнг сотувчи-компаниянинг ходимлари томонидан Ўзбекистон ҳудудида ишга тушириш ва созлаш амалга оширилади. Хизмат кўрсатиш даври – 183 кундан ортиқ. ЎзР СКнинг 36-моддасига асосан хизмат доимий муассаса ташкил этилишига олиб келади.

Чет эл компанияси қачон ДМни рўйхатдан ўтказиши керак? Импорт контракти тузилганидан сўнг 30 кун мобайнидами ёки ускуна етказиб берилганидан кейин хизмат кўрсатишни бошлаш факти бўйичами, яъни 2026 йилдами?»

Buxgalter.uz илтимосига биноан «Норма» эксперти Ольга БУСАРОВА тушунтиради:

– Агар ЎзРнинг норезиденти бўлган юридик шахс 183 календарь кундан ортиқ муддатга шартнома тузган бўлса, солиқ тўловчи сифатида ҳисобга қўйиш тўғрисидаги ариза ва тегишли ҳужжатлар доимий муассаса ташкил этилишига олиб келадиган фаолиятни амалга ошириш бошланган санадан 30 календарь кундан кечиктирмай солиқ органига тақдим этилади .

Чет эл юридик шахси томонидан Ўзбекистонда фаолиятни амалга ошириш бошланган сана деб қуйидаги саналар эътироф этилади :

1) қуйидагилар юзасидан ҳар қандай контрактни (шартномани, битимни) тузиш санаси:

а) Ўзбекистон Республикасида хизматлар кўрсатиш, шу жумладан биргаликдаги фаолият тўғрисидаги шартнома доирасида хизматлар кўрсатиш;
б) ушбу юридик шахс номидан Ўзбекистон Республикасида ҳаракатларни амалга ошириш ваколатларини бериш;
в) товарларни Ўзбекистон Республикасида фойдаланиш ёки реализация қилиш мақсадида олиш;
г) Ўзбекистон Республикасида хизматлар кўрсатиш учун бошқа хизматлардан фойдаланиш;

2) Ўзбекистон Республикасида фаолиятни амал ошириш мақсадида биринчи меҳнат шартномасини (битимни, контрактни) тузиш санаси;

3) норезидент бўлган жисмоний шахс ЎзРга келган сана, чет эл юридик шахси томонидан 1 ёки 2-бандларда кўрсатилган контракт (шартнома, битим) шартларини бажариш учун ходим ёки бошқа ходимлар ёлланган сана.

Агар кўрсатилган бир нечта шарт бажарилса, ушбу саналарнинг нисбатан илгаригиси, бироқ 2 ва 3-бандларда кўрсатилган саналарнинг биринчисидан илгари кириб келмаган сана норезидентнинг Ўзбекистонда фаолиятни амалга ошириши бошланган сана деб эътироф этилади .

Яъни шартнома тузилганидан сўнг ҳамда ускуна етказиб берилганидан кейин ариза бериш керак эмас. Уни хизматларни бажариш учун мутахассислар ЎзРга келгандан ёки ёллангандан сўнг топшириш керак.